Jal Jeevan Mission lake isi rongso rongbot arlo kedo an arat atum setame mesen igthirjir alang kejun longji aphansi Central sorkar atum ahin pen isi mesen a scheme deng ponlo. Laso ateng pen Karbi Anglong arlo setame Public health Engineering thihek pen PHE asaikam ahin pen saideng ponsi contractor aphan a scheme tin along saideng ponlo. Bonta kedamtang ningkan isi ra achetim apor pen JJM Contractor atum aphan Assam sorkar ahin pen bill kepi kave pin ajok assam angkangpi along kedo an JJM Contractor atum chingrumsi kachesong asai deng ponlo.
Lason thot si kedamtang paipai niphai ingkoi arni lethot setame Assam angkangpi along ghonta hini apharman JJM Contractor atum kachesong asai deng ponlo. Lason Diphu rongsopi along kedo JJM Contractor Association PHE Department Karbi Anglong atum patirpi ponsi PHE Rural asaihem athengno along ghonta hini apharman kachesong asai deng pon.
Adap porphai kre isi pen anarlo porphai isi an kachesong asai kedeng ahut CAPHED amaiphu Raj Engleng kachari pon along Kongchunbang Kamalsing Taro pen danglok JJM a Contractor atum chetong dunsi nelitum kelong nangji atangka nangchepinoi pura kehang sarlang pon rinti.
Pini nelitum bangso kachesong abangke ladak chotle kachesong vong lapu kali, Assam angkangpi along kedo an a sub division along kado kave long phlikep ra throk along setame bangso kachesong asai deng ponlo. Nelitum bangso JJM a scheme along sorkar nangkepinkhat pon atengsi klem ponlo, setame kedamtang niphai isi ra achetim sose pen bill nangkepipe det ajok si nelitum bangso kachesong asai deng nangkoklo pusi maiphu Raj ENgleng pen ningje pon.
Bangso akachesong abangke JJM a contractor atum akesung aphuthak sorkar atum phan kachepaklangji aphansi chesong ponlo. Kedamtang apor ahut Assam CM pen kaningje pon abangke nangtum aphan phant krethrok GST nangkangthan dun abangke phant throk abangke contractor atum aphan nangchepi detpo pusi ningjelo, bonta pini arni anta nangpipe lang puta Kongchunbang Komalsing Taro pen ningje ponthu.
Nelitum bangso JJM asai amo keklem lake kodopik penle kachoklemdun lapu kali setame sorkar along kacherap dun kenangsot pu pen ajok komatne atum abangke kaprek long pen kachoram lapen komatne atum abangke bank along choram pensi sai klem ponlo, bonta nelitum kepadam atang anta chelong vangve lang, lasi KAAC CEM ronghang pen danglok Assam CM Sarma atum akanghoi kangjinso dora JJM a Contractor atum aphan bill nangpi vektha pura kachesongatum choningri pon rinti. News report KAL
